Presidenti i Shteteve të Bashkuara, Donald Trump, ka nënshkruar urdhrat ekzekutivë që shënjestrojnë TikTok dhe WeChat, dy nga aplikacionet më të mëdha të Kinës.
Në bazë të këtyre urdhrave. pas 45 ditësh, ndalohen transaksionet e kompanive amerikane me pronarët kinezë të TikTok dhe WeChat.
Trump përmendi shqetësimet e sigurisë kombëtare, teksa tha që TikTok mund të përdoret për fushatat dezinformuese në dobi të Partisë Komuniste Kineze.
“Aplikacioni Tiktok është vlerësuar si një kërcënim për sigurinë kombëtare dhe Shtetet e Bashkuara duhet të ndërmarrin veprime agresive kundër pronarëve të TikTok”, thuhet në urdhër.
Në urdhrin tjetër ekzekutiv, Trump tha se WeChat automatikisht regjistron të dhënat nga përdoruesit e tij.
“Kjo mbledhje e të dhënave përbën kërcënim pasi Partia Komuniste Kineze ka qasje në informacionet personale dhe pronësore të amerikanëve”, thuhet në urdhër.
Në fillim të kësaj jave, kreu i Shtëpisë së Bardhë, kërcënoi se do të mbyllte TikTok në SHBA, përveçse nëse operacionet e tij shiten tek ndonjë kompani amerikane. Kompania amerikane Microsoft ka thënë se është në diskutime për një blerje të tillë./Opinion.al
