Presidenti i Shteteve të Bashkuara të Amerikës, Donald Trump mësohet t’i ketë ofruar ndihmë Kinës lidhur me përpjekjet për të kontrolluar shpërthimin e një koronavirusi, i cili deri tani ka shkaktuar 81 viktima.
“Kemi komunikime shumë të afërta me Kinën, në lidhje me virusin. Shumë pak raste janë raportuar në SHBA, por janë rreptësisht nën vëzhgim. I kemi ofruar Kinës dhe presidentit Xi (Jinping) çdo ndihmë që është e nevojshme. Ekspertët tanë janë të jashtëzakonshëm”, -ka shkruar Trump në Twitter.
Qendra e shpërthimit të virusit është qyteti Wuhan i Kinës, me një popullsi prej 11 milionë banorësh.
Ditën e sotme autoritetet në Kinë kanë raportuar vdekjen e parë nga virusi në Pekin.
Viktima është një person 50 vjeç, i cili ka qenë në Wuhan. Sipas zyrtarëve, shumica e viktimave janë pacientë të moshës 50 vjeç ose më të vjetër.
