TIRANE- Më 10 tetor 2014 tre shpërthime tritoli tronditën Tiranën por fatmirësisht pa viktima. Në pak minuta u mësua se njëri prej shpërthimeve kishte ndodhur në farmacinë në pronësi Bashkim Tahirit, babait të ministrit të Brendshëm. Shpërthimi i dytë ishte në një rrugicë pranë farmacisë, në banesën e shefit të Krimeve në Korçë, Alfred Numani. Shpërthimi tretë ishte pranë stacionit të autobusit në rrugën Muhamet Gjollesha.
Direktet pas këtyre ngjarjeve u lakua emri i familjes Gjuta. Pak muaj më vonë u ngritën edhe akuzat ndaj tyre. Për këtë ngjarje po hetoheshin me masën e sigurisë arrest me burg Vladimir Gjuta, i cili më herët (para tritolit) dyshohet se kishte kërcënuar në telefon Tahirin. Po në burg mbahej edhe Baftjar Bruka, që sipas dyshime policore ishte personi që kishte vendosur tritolin në farmaci.
Vladimir Gjuta u arrestua me bujë në qershor të vitit 2015 në një operacion të forcave speciale RENEA, pranë tunelit të Kalimashit. Gjuta ishte i maskuar me një paruke kur u soll me pranga në Tiranë. Ai dyshohej si “koka” e sulmeve të 10 tetorit.
Sakaq Baftjar Bruka u arrestua në Norvegji në shkurt të 2015-ës. Të dy këto persona kanë mohuar, kur kanë dalë në gjykatë, për masën e sigurisë autorësinë e këtyre sulmeve. Po kështu për këtë ngjarje janë arrestuar dhe më pas liruar edhe 4 persona të tjerë të afërm të Vladimir Gjutës.
Sot, 2 vite e gjysëm pas ngjarjes tek farmacia e Tahirit Vladimir Gjuta dhe Bafjar Bruka lirohen nga akuzat. Ngjarja mbetet pa autorë. Me kërkesë të prokurorisë për Krime të Rënda është vendosur të pushohet procedimin penal ndaj shtetasve Vladimir Gjuta dhe Baftjar Bruka, të dyshuar për veprat penale të “Veprave me qëllime terroriste”, “Krijimit të grupit të strukturuar kriminal” dhe “Kryerjes së veprave penale nga grupi i strukturuar kriminal”.
“ Këta shtetas, së bashku me disa të tjerë, për të cilët janë pushuar hetimet më parë, kanë qenë të dyshuar si autorë të vendosjes dhe shpërthimit të tritolit të telekomanduar në biznesin ”Farmaci” të shtetasit B.T, si edhe vendosjen e lëndës plasëse pranë një stacioni autobusi në zonën pranë shkollës ”Vasil Shanto” në Tiranë, ngjarje të ndodhur duke gdhirë data 10.02.2015. Prokuroria e Krimeve të Rënda ka zhvilluar hetimin ndaj personave të dyshuar, nën masën e sigurisë ”arrest në burg”, pasi nga materialet paraprake dyshohej se mund të ishin autorët e këtyre ngjarjeve”, thuhet në njoftimin e prokurorisë.
“Gjatë zhvillimit të hetimeve janë kryer një sërë veprimesh proceduriale, përfshirë edhe ekspertiza të specializuara në bashkëpunim me partnerët ndërkombëtarë, në përfundim të të cilave nuk u provua shkencërisht dhe nuk u siguruan fakte që të provonin përtej çdo dyshimi të arsyeshëm se të arrestuarit ishin organizatorë dhe ekzekutorë të akteve të mësipërme. Krahas faktit që nuk janë arritur të grumbullohen të dhëna konkrete mbi veprimet e të hetuarve për kryerjen e veprave penale, Prokuroria për Krime të Rënda nuk zbuloi motiv se përse këta shtetas mund të kryenin veprat penale për të cilat dyshoheshin. Ndërkohë, ndaj të hetuarve Vladimir Gjuta dhe Baftjar Bruka vijon të jetë në fuqi masa e sigurimit ”arrest në burg” vendosur nga Gjykata e Rrethit Gjyqësor Kukës, për vepra të tjera penale, të cilat janë nën hetim nga Prokuroria e Kukësit”bën të ditur prokuroria.
/Opinion.al
