TIRANE- Një muaj përpara se prokuroria të pushonte akuzat ndaj Vladimir Gjutës për tritolin tek farmacia e babait të ministrit të Brendshëm, Saimir Tahiri, ABCNews raportonte se çështja po shkonte drejt mbylljes.
Sipas këtij TV, Ministri i Brendshëm, Saimir Tahiri ka refuzuar fletë-thirrjet e Prokurorisë për Krime të Rënda.
ABCNews raporton se ministri Tahiri nuk i është përgjigjur dy ftesave të prokurorisë për të dhënë shpjegime, me cilësinë e të dëmtuarit në dosjen ndaj të dyshuarve për vendosjen e tritolit në farmacinë e babait të tij.
Burimet thanë se ministri Tahiri, përveç mosparaqitjes, nuk ka kthyer edhe përgjigje për arsyen e refuzimit për të dhënë shpjegime.
Ndërsa në një prononcim në media, në lidhje me autorësinë e vendosjes së tritolit, ministri Tahiri pati deklaruar se autorët janë në burg, duke iu referuar arrestimit të pjesëtarëve të familjes Gjuta.
ABCNews kërkoi një koment nga Minsitria e Brendshme, për këtë refuzim, por ende nuk ka marrë një përgjigje.
Nga ana tjetër, babai i tij, Bashkim Tahiri është marrë në pyetje pas ngjarjes, duke ngritur dyshime se tritolin ia kishin vendosur në farmaci për shkak të detyrës së djalit, si ministër i Brendshëm pasi ka mohuar në mënyrë kategorike se ai është i përfshirë në ndonjë konflikt që mund të ketë sjellë vendosjen e eksplozivit në biznesin e tij.
Ndërkohë Policia e Shtetit ishte angazhuar maksimalisht për zbardhjen e kësaj ngjarje, duke kryer edhe një sërë ekspertizash shkencore për të provuar autorësin e tritolvënies.
Ndërsa shefi i tyre, ministri i Brendshëm nuk pranon të japë dëshminë, për të sqaruar hetuesit se cili ka qenë konflikti apo arsyeja që të dyshuarit e arrestuar, pjesëtarë të familjes Gjuta, i kanë vendosur eksplozivin mëngjesin e datës 10 shkurt të vitit 2014 në farmacinë e babait të tij.
Burimet thonë se refuzimi i Ministrit për të dhënë shpjegime dhe motivin e konfliktit të mundshëm me pjesëtarët e familjes Gjuta, ka zbehur edhe provat e pakta që hetuesit kanë siguruar për ngjarjen.
