Kriza në Lindjen e Mesme po rrit pasigurinë globale, ndërsa vendimet e papritura të udhëheqësve si Presidenti amerikan Donald Trump dhe udhëheqësi i ri suprem i Iranit, Mojtaba Khamenei, po përcaktojnë rrjedhën e konfliktit.
Sipas analizës së CNN, operacioni ushtarak amerikan ka për qëllim të kufizojë aftësinë e Iranit për të përdorur fuqinë e tij ushtarake jashtë kufijve, duke goditur sisteme raketash, objekte prodhimi dronësh, forcë detare dhe ajrore, si dhe pjesë të mbetura të programit bërthamor. Njëkohësisht, tensionet në Gjirin Persik dhe Ngushticën e Hormuzit ndikojnë në tregjet ndërkombëtare të energjisë dhe rrisin koston ekonomike për Uashingtonin.
Analisti Brett McGurk përcakton tre skenarë kryesorë për zhvillimin e krizës:
Skenari bazë (60%) “Iran i kufizuar”: SHBA dhe aleatët mund të kufizojnë fuqinë ushtarake të Iranit pa rrëzuar regjimin në Teheran, duke monitoruar hapësirën ajrore dhe duke ruajtur sanksionet ndërkombëtare.
Skenari më i keq (30%) Iran më agresiv: Një përfundim i parakohshëm i operacionit mund t’i lërë Iranit aftësi të rindërtuara ushtarake dhe bërthamore, duke rritur pasigurinë në Lindjen e Mesme dhe koston ekonomike globale.
Skenari më i mirë (10%) “Iran i ri”: Presioni ushtarak dhe ekonomiko-politik mund të çojë në dobësimin e regjimit dhe mobilizimin e qytetarëve për ndryshime brenda vendit, por gjasat janë të ulëta pa një opozitë të fortë dhe të organizuar.
Analiza thekson se këto skenarë mund të kombinohen dhe evoluojnë me kalimin e kohës, ndërsa udhëheqja e re iraniane mund të vazhdojë sulmet me raketa dhe dronë, duke ruajtur aftësinë operacionale, edhe pas përfundimit të misioneve kryesore amerikane. Përfundimi më i mundshëm është një Iran më i dobësuar dhe i kufizuar, me pasiguri të konsiderueshme për stabilitetin e rajonit në vitet e ardhshme.
