Kryebashkiaku i Tiranës Erion Veliaj, i ka quajtur deputetët e Partisë Demokratike, kalamaj frikacakë që mbajnë armë e dhunojnë gratë.
Kështu u shpreh Veliaj në një prononcim për mediat nga Spitali i Traumës, ku vizitoi 3 efektivet e Policisë Bashkiake që u lënduan gjatë protestës së sotme tek këndi i lojërave pranë Parkut të Liqenit Artificial.
“Bashkia është në krye të detyrës dhe Tirana nuk është as Alepo dhe as Palmira. Ne kemi bërë disa denoncime. Nuk më intereson sa vip është deputeti, në thelb janë kalamaj frikacakë që marrin armë kundër grave. Parti që nuk e njeh trimërinë. Trimëri është që të respektosh ligjin,” tha kryebashkiaku duke shtuar se Bashkia e Tiranës ka bërë disa denoncime.
Veliaj tha se 3 policet, Ludina Sinani 44 vjeç,Sonila Azemi 25 vjeç dhe Doriana Kolgjinaj 24 vjeç po marrin ndihmën mjekësore.
“3 kolegeve të Policisë Bashkiake, u urojmë shërim të shpejtë. Kemi një prej tyre që ka shembje të klavikulës dhe do marrë një kujdes më të specializuar. Njëra ka shembje në kokë dhe tjetra në këmb,” informoi Veliaj.
