Deri tani, futbollistët nga Kosova kanë qenë të detyruar të zgjedhin mes Shqipërisë, Zvicrës apo në raste të veçanta edhe mes përfaqësueseve të
tjera.
Çështja e lojtarëve kosovarë që mund të largohen nga Shqipëria ishte shumë e diskutuar gjatë Europianit. Shumë emra lojtarësh janë përfolur se do të lënë përfaqësueset e mëparshme për të luajtur për Kosovën.
Dhe, në një situatë të tillë, është trajneri i Kombëtares së Kosovës, Albert Bunjaki, i cili ndez “gjakrat”. Në një intervistë për gazetën “Panorama Sport”, ai ka deklaruar se lojtarë kosovarë që janë pjesë e Shqipërisë kanë shprehur dëshirën të luajnë për Kosovën.
Fillimisht, është thënë se ka marrëveshje mes Kosovës dhe Shqipërisë për lojtarët kosovarë që luajnë me Shqipërinë. Tani që përfundoi edhe Europiani, doja t’iu pyesja nëse është vendosur ndonjë rregull apo çdo lojtar do të zgjedhë sipas dëshirës?
Gjithmonë lojtarët duhet të zgjedhin sipas dëshirës së tyre dhe nuk është e drejtë e asnjë federate për të vendosur për fatin e lojtarëve! Pra, numri një është vendimi i lojtarëve dhe kjo gjithmonë duhet të respektohet! Kosova është në pritje të një vendimi nga FIFA për lojtarët e saj që luajnë në kombëtare të tjera. Natyrisht që do të jenë të mirëpritur nëse ata shprehin dëshirën të përfaqësojnë shtetin e tyre.
Keni deklaruar në mediat kosovare se disa lojtarë që kanë marrë pjesë në Europian me Shqipërinë, kanë shprehur dëshirën të luajnë për Kosovën.
Po, e vërtetë. Megjithatë, së pari duhet të presim vendimin nga FIFA dhe pastaj do bisedoj sërish me lojtarët.
A mund ta dimë sa lojtarë të Shqipërisë janë dhe nëse mund të na thoni ndonjë emër?
Përpara se të bëhet publik ndonjë emër, mendoj se është me rëndësi të respektohet deri në fund. Por, interesimi për të përfaqësuar shtetin e
Kosovës ka qenë edhe më parë, pavarësisht faktit që ne nuk ishim të pranuar nga FIFA dhe UEFA.
Ka interesim nga lojtarë kosovarë që luajnë aktualisht me Shqipërinë. Taulant Xhaka dhe Shkëlzen Gashi janë përfolur pas Europianit se mund t’i bashkohen Kosovës?
E thashë që nuk do të ishte profesionale të përdor emra lojtarësh. Me kohë dhe pas një vendimi pozitiv që shpresojmë të jetë nga FIFA, sigurisht do
kuptohen kush janë dhe nga vijnë.
Po për Adnan Januzajn, keni shprehur sërish interesim për ta bërë pjesë të Kosovës?
Është i njëjti rast. Duhet të presim përgjigjen, pastaj do jetë shumë më e lehtë. Por, është normale që ne jemi shumë të interesuar që Adnani të jetë
mes nesh.
