Në mesin e personave që humbën jetën nga shpërthimi i nëndetëses “Titan” ishte miliarderi nga Pakistani Shahzada Dawood dhe djali i tij, 19-vjeçari Suleman.
Në një intervistë të dhënë pas tragjedisë nëna e adoleshentit, Christine Daëood ka thënë se në fillim kishin planifikuar që ajo të shkonte të eksploronte nën ujë me bashkëshortin, por vendosi t’ja linte vendin e saj të birit, pasi sipas saj “ai e donte vërtet atë gjë.”
Ajo thotë se ata ishin të emocionuar për të parë më në fund rrënojat legjendare të Titanikut.
Kërkimet për gjetjen dhe shpëtimin e banorëve të Titanit zgjatën për disaditë, derisa u gjetën rrënojat e zhytësit dhe u njoftua zyrtarisht vdekja e pesë burrave. Megjithatë, për Christine Dawood, e cila fillimisht u përpoq të qëndronte optimiste, çdo gjurmë shprese u zhduk kur kishin kaluar 96 orë nga zhdukja e anijes, që do të thoshte se oksigjeni brenda nëndetëses ndoshta kishte mbaruar.
“Ky ishte momenti kur humba shpresat dhe i dërgova mesazh familjes sime, duke u thënë se po përgatitesha për më të keqen,” tha Dawood për BBC.
Christine nderoi djalin e saj 19-vjeçar, student në Universitetin Strathclyde, i cili kishte marrë me vete një kub Rubik në zhytës, duke shpresuar se do të thyente rekordin botëror për zgjidhjen e tij në pikën më të thellë të detit.
Siç u zbulua nga gruaja me origjinë gjermane e manjatit pakistanez, plani fillestar ishte të shkonte me burrin e saj për të parë mbetjet e “Titanik” me nëndetësen OceanGate. Por rrëfen ajo, ai udhëtim u anulua për shkak të pandemisë. “Pastaj u tërhoqa dhe e lashë djalin të merrte pjesë, sepse ai me të vërtetë e donte atë gjë,” thotë ajo. “Të gjithë menduam se thjesht do shihnin rrënojat, tronditja erdhi pas rreth 10 orëve”-shton më tej gruaja.
Por me kalimin e kohës kur nëndetësja nuk po gjendej, filloi shqetësimi për fatin e saj. Pas disaditësh, kur tashmë ekspertët thoshin se edhe nëse Titani nuk do të ishte shkatërruar, nuk do të kishte oksigjen të mjaftueshëm brenda për të mbijetuar pasagjerët, ajo kuptoi të vërtetën e tmerrshme. Në vend të kësaj, vajza e saj 17-vjeçare vazhdoi të shpresonte derisa u gjetën rrënojat e nëndetëses./Opinion.al
