Tre gra mbetën të vdekura dhe katër persona të tjerë u plagosën pas ngjarjes së rëndë të regjistruar një ditë më parë në Itali, ku një person qëlloi me armë në një mbledhje për çështje pronësie.
Të tjera detaje janë zbardhur nga mediat italiane mbi ngjarjen e rëndë, ndërsa një prej viktimave mësohet se ishte mike e kryeministres së Italisë, Giorgia Meloni.
Viktima kanë mbetur Sabina Sperandio, 71, Elisabetta Silenzi, 55 dhe Nicoletta Golisano, 50 vjeç. Nga të shtënat mbetën të plagosur edhe katër persona të cilët u dërguan menjëherë në spital për ndihmë mjekësore. Mes të plagosurve, një grua është në gjendje shumë të rëndë shëndetësore, e cila ka marrë plagë në kokë dhe tashmë është në reanimacion në Sant’Andrea . Gjithashtu, një 65-vjeçar, i cili u sëmur gjatë të shtënave, u shtrua në gjendje shoku në spitalin e Pertinit.
Sakaq, Meloni ka reaguar në një status në rrjetet sociale ku dhe ka postuar foto me mikeshën e saj.
“Nicoletta ishte një nënë, një shoqe e sinqertë dhe e matur, një grua e fortë dhe e brishtë në të njëjtën kohë. Por ajo ishte mbi të gjitha një profesioniste me një ndjenjë të pazakontë të detyrës. Ishte pikërisht ndjenja e detyrës që e solli atje, një mëngjes të së dielës, ku një burrë po priste që ta vriste me armë zjarri, së bashku me dy gra të tjera, gjatë një takimi të bashkëpronësisë në Romë. Nikoleta ishte shoqja ime. Ajo la burrin e saj Giovanni dhe një djalë të mrekullueshëm dhjetëvjeçar, Lorenzo. Bashkë me tuajat janë shkatërruar edhe familje të tjera, të cilave u shpreh gjithë afërsinë time”. Meloni përfundon duke shkruar: “Nicoletta ishte e lumtur dhe e bukur me fustanin e kuq që kishte blerë për festën e ditëlindjes së saj të pesëdhjetë disa javë më parë. Për mua ajo do të jetë gjithmonë e bukur dhe e lumtur kështu. Lamtumirë Nico. Të dua”.
