Ish-kryetarja e Kuvendit të Shqipërisë, Jozefina Topalli ka thënë se në Shqipëri po instalohet një regjim autoritar dhe fashist.
Në fjalën e saj nga foltorja e Kuvendit ajo nënvizoi se ne qeverisemi nga një Kryeministër që është krenar se tallet me popullin e tij, se fyen popullin e tij, që i thotë dele, shpellar, qorr dhe budalla.
“A ka ndodhur ndonjëherë në 25 vjet që ambasadorët të shkojnë në komisione dhe të marrin fjalën? A ka ndodhur ndonjëherë në 125 vite që ambasadorët të kërkojnë pjesëmarrjen dhe fjalën në grupet parlamentare?”, tha Topalli.
Ndërsa, theksoi:
“Kurrë! Kurrë asnjëherë! Nga 1912 që është bërë ky shteti shqiptar, megjithë peripecitë dhe ulje ngritjet, nuk ka ndodhur një gjë e tillë”.
Ajo pyet, pse ndodh kjo?
Sipas Topallit, sepse kryeministri na quan barbar, sepse ai ka futur në parlament kriminelë.
Ajo thekson se a nuk pranoi vetë Mark Frroku dje vrasjen për të fituar gjykim të shkurtuar?
“Atëherë kush është barbari këtu? Ne apo Edi Rama që futi Mark Frrokun në parlament?”, pyet Topalli.
Deputetja e PD-së, ndër të tjera, vuri në dukje se pse të mos kërkojnë ata të vijnë tek komisionet parlamentare dhe t’ju kërkojnë se çfarë duhet bërë.
Sipas saj, heshtja është mafia.
“Ne nuk kemi nxjerrë Paolo Borsellino apo Xhovani Falkone, por ne kemi njerëz me kurajo këtu, që thyejnë heshtjen dhe denoncojnë ata që vrasin, ata që u çojnë gjoba bizneseve, që kërcënojnë rektorët, ata që ju marrin pasuritë o ju biznesmenë, që nuk keni kurajo për të folur”, tha topalli.
Topalli theksoi më tej se kur ne kemi një kryeministër që ndihmon një vrasës si Arben frroku të ikë dhe më pas përpiqet ta mbrojë me prishjen e shenjave të gishtave, a nuk kanë të drejtë ambasadorët të flasin në grupet tona parlamentare?
“Po. Kanë të drejtë. Se ky nuk është parlament përfaqësues. Sepse nuk mund të jetë përfaqësues dikush që ka vrarë, një trafikant qeniesh njerëzore”, tha ajo.
Ndërsa, theksoi se nuk është koha për të heshtur dhe as për t’u kërrusur, gjërat duhen thënë në mënyrë direkte.
“ Ky vend nuk mund të ecë kështu përpara. Nuk ka nevojë ky vend vetëm për reformën në drejtësi. Do të isha e pandershme, e padrejtë. Nuk jam që të votoj reformën pa e parë dhe pa e diskutuar. Unë mendoj se ky vend ka nevojë për punësim, për shpresë për dinjitet. Ka nevojë për njerëz që e duan”, tha Jozefina Topalli.
