Gjashtë ditë në javë, 48 orë në javë. Kështu vendosi qeveria greke, sipas së cilës, kjo mëyrë do të plotësojë boshllëkun në vendet e punës, shkaktuar nga rënie e popullsisë dhe mungesa e punëtorëve të kualifikuar. Mirëpo, për sindikatat e punëtorëve kjo masë është konsideruar “barbare”. Për ta, Greqia po bën hapa pas, krahasuar me vendet e tjera të civilizuara që po miratojnë javën me katër ditë pune.
Përpara shpalljes së legjislacionit, kryeministri grek, Kyriakos Mitsotakis, theksoi ndryshimin e pritshëm demografik të vendit. Rreth 500 000 grekë, kryesisht të rinj dhe të arsimuar, kanë emigruar në një eksod të paprecedentë që kur shpërtheu kriza e borxhit në fund të vitit 2009. Java gjashtëditore, e cila hyri në fuqi më 1 korrik, vlen vetëm për bizneset private që ofrojnë 24 orë shërbime. Stafi në industri dhe objektet prodhuese kanë mundësinë të punojnë dy orë shtesë në ditë ose një turn shtesë tetë orësh, të shpërblyer me një komision prej 40% të shtuar në pagën e tyre ditore.
