Një 46-vjeçar është vënë në pranga pasi tentoi të vriste me armë zjarri një 27-vjeçar. Ngjarja ka ndodhur në Vqarr të Tiranës për shkak të një konflikti për çështje pronësie.
Sipas uniformave blu, Gazment Xhabafti ka tentuar të vrasë me armë zjarri shtetasin J. M., 27 .
Efektivët e Policisë, gjatë kontrollit në vendin e ngjarjes, kanë gjetur armën e zjarrit pushkë, me fishek në fole, gati për qitje, me të cilën 46-vjeçari ka tentuar të vrasë 27-vjeçarin. Gjithashtu, gjatë kontrollit të banesës së 46-vjeçarit, shërbimet e Policisë kanë gjetur dhe sekuestruar në cilësinë e provës materiale municion luftarak, një silenciator të modifikuar, një palë dylbi dhe një armë gjahu.
Gazment Xhabafti 46 vjeç akuzohet për veprat penale “Vrasja me dashje”, mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit”.
Materialet i kaluan Prokurorisë, për veprime të mëtejshme procedurale.
