TIRANE- Pas lajmit se në Tiranë do të vendosen kamera në çdo cep dhe e gjitha është duke u sanksionuar me ligj, ka reaguar ministri i Brendshëm Saimir Tahiri. Teksa mori pjesë në inagurimin e komisariatit nr. 3 ai tha se kamerat e sigurisë do të vendosen për mbrojtjen e qytetarëve si dhe u ktheu përgjigje atyre që janë kundër.
Gazetari: A do të bëhet Tiranë si Londra, pasi keni parashikuar që të vendosni kamera në çdo rrugë, autobuz, taksi apo hyrje pallati?
Tahiri: Unë do të doja që shkollën ku studiojnë fëmijët tanë të kishte kamera sigurie. Do të doja që në pallatin ku banojnë shqiptarët, në rastet kur ka elementë rreziku, supozoj, ka persona me precedentë të theksuar penalë, të ketë elementë të shtuar sigurie. Ne të gjithë do të donim që në lokalet e natës të ketë elementë të shtuar sigurie për shumë arsye. Kjo nuk cënon privatësinë e askujt. Kjo ndërton sigurinë e të gjithëve. Ne bëjmë një gabim shumë të madh – përgjegjësinë për sigurinë ia ngarkojmë vetëm Policisë duke drejtuar gishtin e përgjegjësisë atëherë kur ndodh diçka. Por mos harroni nga njëra anë, sistemi gjyqësor rikthen në komunitet njerëz të cilët arrestohen disa herë nga policia dhe nuk marrin kurrë dënimin e duhur. Jemi shumë vonë madje, sepse në të gjithë kryeqytetet e botës, ka elementë sigurie të shtuar, ka kamera, marrëveshje të caktuara me njësitë e sigurimit.Mos kini frikë nga kamerat apo nga elementët e sigurisë. Janë aty dhe do jenë aty për të mbrojtur komunitetet tona.
