Tirana numëron sot 100 vite nga shpallja kryeqytet i Shqipërisë.
Kreu i Partisë Demokratike, Lulzim Basha i ka dedikuar kësaj ngjarjeje një postim në Facebook.
Ai falenderon qytetarët autoktonë të Tiranës si dhe kujton se kryeqyteti ka qenë qendra e shqiptarëve ku kanë kërkuar një jetë më të mirë.
“Sot kryeqendra e shqiptarëve kremton 100 vjetorin e saj si kryeqytet. Në këtë ditë historike, mirënjohja e parë me përulësi i takon komunitetit autokton të Tiranës që me shpirtgjerësi të pashembullt dhe me qytetari legjendare, mundësoi që ky qytet të rritet, të zhvillohet dhe të kthehet në vatër të të gjithë shqiptarëve, të rinisë dhe shpresave të gjithë kombit.
Tirana mbajti mbi supet e saj pesha të rënda në kohë të vështira. Familjet e mëdha të Tiranës hapën dyert dhe zemrat për shumë prej shqiptarëve të dëbuar nga trojet stërgyshërore, dhe për këdo që kërkoi dhe gjeti shanset për një jetë më të mirë pas rrëzimit të regjimit komunist.
Qendra ekonomike, kulturore dhe shoqërore e Shqipërisë, mbetet sot zemreku i kombit ku ngërthehet shpresa dhe besimi i shqiptarëve për një të nesërme më të mirë. Zoti e bekoftë Tiranën, Shqipërinë dhe shqiptarët!” , shkruan Basha.
Ai shërbeu në krye të Bashkisë së Tiranës nga viti 2011 deri në vitin 2015 duke pasuar kryeministrin aktual Edi Rama. Basha nuk rikandidoi për një mandat të dytë për detyrën e kryebashkiakut. /Opinion.al
