Studimi i fizibilitetit të autostradës Thumanë – Kashar ka treguar se kostoja e segmentit është 169 milion euro pra pothuajse 50% më lirë se koncesioni PPP, të cilin qeveria e anuloi në janar të këtij viti.
Gazeta Monitor i referohet “Raportit të monitorimit të strategjisë së zhvillimit të transportit 2016-2020” në Ministrinë e Infrastrukturës, për të bërë me dije faktin se studimi i fizibilitetit të këtij aksi ka rezultuar me një kosto 169 milion euro. Ky studim u aprovua nga qeveria dhe u financua nga donatorët.
Segmenti Thumanë – Kashar është pjesë e autostradës Adriatiko-Joniane, i cili është projekti i vetëm i infrastrukturës rrugore shqiptare që ka marrë financime nga Bashkimi Europian nëpërmjet Procesit të Berlinit. Megjithëse të gjitha akset e këtij projekti do të financoheshin nga BE, qeveria e Shqipërisë shpalli ndërtimin me PPP për të dy akset Milot – Balldren dhe Thumanë – Kashar pa përfunduar studimi i fizibilitetit.
Planifikimi për ndërtimin e këtij segmenti, sipas projektbuxhetit të vitit 2019 ishte me vlerë 45.5 miliardë lekë ose rreth 330 milion euro pra pothuajse dyfishi i kostos që paraqet studimi i fizibilitetit. Megjithatë qeveria e anuloi këtë koncesion në janar të këtij viti, kur sapo kishin përfunduar protestat studentore, me argumentin se fondet do të devijoheshin për të plotësuar nevojat e arsimit të lartë.
Fakti se ndërtimi me PPP i rrugës paraqet kosto shumë më të larta për ndërtimin e rrugës mesa duket nuk e ka ndikuar qasjen e qeverisë përsa i përket projektit të autostradës Adriatiko – Joniane pasi segmenti Milot – Balldren po financohet me koncesion PPP, ku kompania ANK do të ndërtojë 15 kilometër kundrejt 300 milionë eurove sipas parashikimeve në kuadrin afatmesëm buxhetor. /Opinion.al
