Thirrjet e Mirlind Dakut pas ndeshjes me Kroacinë duket se do t’i kushtojnë sulmuesit të Kombëtares.
Teksa priten masa disiplinore nga UEFA, rregulloret e së cilës nuk lejojnë asnjë thirrje banderolë apo përfshirje në diskriminim racial, Daku do të ndëshkohet edhe nga klubi i tij në Rusi, Rubin Kazan.
Në një komunikatë për mediat, dënohet veprimi i tij dhe thuhet se pas kthimit në klub, atij do t’i komunikohet ndëshkimi.
“Klubi ynë pranon përgjegjësinë për atë që ndodhi. FC Rubin përfaqëson një ekip shumëkombësh dhe i përmbahet gjithmonë parimeve të respektit dhe barazisë, duke dënuar kategorikisht çdo formë diskriminimi dhe fyerjeje për baza kombëtare, fetare apo racore. Pas kthimit në ambientet e klubit, futbollistit do të zbatohen sanksione disiplinore dhe financiare”, njoftoi skuadra ruse.
Ai mori megafonin në përfundim të sfidës së Europianit në Hamburg dhe lëshoi thirrje ofenduese ndaj popullit maqedonas, gjë për të cilën Federata e Maqedonisë së Veriut bëri denoncim në UEFA.
Daku gjithashtu është nën hetim nga UEFA, ashtu siç janë edhe Federatat e Futbollit të Shqipërisë dhe Kroacisë.
Një ditë pas ndeshjes, Daku kërkoi falje në rrjetet sociale, por kjo shërben vetëm për të ulur masën e dënimit.
