Ambasadorja amerikane Yuri Kim, dhe Ambasadori i Bashkimit Europian Luigi Soreca patën sot një takim me Kryetarin e Komisionit Qendror të Zgjedhjeve Ilirjan Celibashi. Sikurse bëhet e ditur në faqen e Ambasadës Amerikanë në Tiranë, në qendër të takimit ka qenë diskutimi për përmirësimin e procesit zgjedhor në Shqipëri.
“Duke cituar raportin e fundit të ODIHR, Ambasadorët Kim dhe Soreca shprehën vlerësimin për administrimin kompetent të zgjedhjeve të 25 prillit nga KQZ. Ambasadorët nënvizuan se tani është përgjegjësi e të gjitha institucioneve, autoriteteve dhe partive për të punuar me KQZ-në për të trajtuar rekomandimet e raportit përfundimtar të ODIHR-it”, bën me dije Ambasada.
Njëkohësisht gjatë takimit u vu theksi tek hetimi i parregullsive dhe ndjekja e krimit zgjedhor.
“Po ashtu, është thelbësore që autoritetet të hetojnë parregullsitë dhe të ndjekin penalisht krimet zgjedhore, përfshi blerjen e votave, kërcënimin e votuesve dhe përpjekjet e tjera për t’u mohuar votuesve të drejtën për të votuar të lirë, pa frikë, trysni apo joshje të paligjshme. Shtetet e Bashkuara do të vazhdojnë të mbështesin me forcë të gjitha përpjekjet për të siguruar që zgjedhjet në Shqipëri të përmbushin standardet më të larta, në mënyrë që vullneti i zgjedhësve të respektohet plotësisht”, thuhet në njoftimin e Ambasadës Amerikane./Opinion.al
