Ditën e nesërme do të nis punimet Kongresi i Partisë Socialiste, ku do të zgjidhen edhe anëtarët e rinj të Asamblesë Kombëtare.
Punimet e këtij Kongresi do të ndahen në tre sesione, në ditën e parë do të ketë diskutime për barazinë gjinore me fokus promovimin e gruas, me 29 Shkurt do të përqendrohet në arritjet dhe sfidat e qeverisë, ndërsa në 1 Mars kryefjala e Kongresit do të jenë të rinjtë.
Ndërkohë, mësohet se disa anëtarë të Partisë Socialiste i kanë drejtuar një mocion Kongresit, që do të mbahet në tre ditë, ku kërkojnë reformimin e Partisë Socialiste.
Ata propozojnë një paketë me 10 ndryshime themelore në programin dhe statusin e parisë, duke kërkuar që ato të paraqiten për votimin në Kongresin e datës 29 shkurt.
Objektivat kryesorë të mocionit janë: “Parti me liri fjale, fotim të ndershëm, vendimmarrje dhe drejtim kolegjial. Parti me integritet, e pakpashme nga korrupsioni dhe krimi i organizuar. Parti që realizon qeverisjen e majtë demokratike, që mbron dhe u shërben interesave themelore të shtetasve shqiptarë, kudo ë jetojnë.”
Anëtarët të cilët kanë hartuar mocionin kanë mbajtur poste të larta në Partinë Socialiste deri në nivele ministrore.
Konkretisht anëtarët që kanë propozuar këto ndryshime janë Arta Dade, Eva Teqja, Ibrahim Sula, Irena Beqiraj, Luan Zhegu, Maqo Lakrori, Nazmir Bilali dhe Përparim Bodinaku./ Opinion.al
