Drejtori i Kolegjit Policor, Ylli Vasili ka sqaruar sot në një konferencë për mediat procedurat e testimit që do të bëhet më datë 4 shtator për rekrutimet e reja për Patrullë të Përgjithshme.
Në testim njoftoi Vasili do të marrin pjesë 2120 aplikantë për 500 vende të lira pune.
“Më datë 4 shtator, në Pallatin e Kongreseve, 2 120 aplikantë do të marrin pjesë në testimin me shkrim. Testimi do të zhvillohet në dy faza, brenda ditës.
Në fazën e parë do të marrin pjesë aplikantët e qarqeve Tiranë, Berat, Durrës e Fier, të cilët duhet të jenë prezent në Pallatin e Kongreseve, në orën 07:30 të mëngjesit.
Në fazën e dytë do të marrin pjesë aplikantët e qarqeve Gjirokastër, Vlorë, Elbasan, Korçë, Lezhë, Shkodër, Kukës, Dibër, të cilët duhet të jenë prezent në orën 12:00, në Pallatin e Kongreseve” deklaroi Vasili.
Gjatë testimit ai kujtoi se aplikantëve nuk do ti lejohet të kenë celular me vete dhe ambienti do të survejohet nga kamerat për të eliminuar cdo abuzim. Pyetjet e provimit do të kenë karakter të formimit të përgjithshëm, bëri me dije Drejtori i Kolegjit Policor.
“Në prezencë të një grupi me rreth 30 aplikantë të zgjedhur si përfaqësi nga vetë aplikantët, bëhet korrigjimi me skandron dhe përgjigjet afishohen menjëherë në Pallatin e Kongreseve. Çdo konkurent, në fund të çdo faze konkurimi, në rast se nuk është dakord me rezultatin, ka të drejtën e ankimimit brenda dy ditëve. Ankesa bëhet me shkrim dhe dorëzohet në Akademinë e Sigurisë në zyrën e Burimeve Njerëzore dhe më pas kjo ankesë i përcillet Komisionit të Apelimit në Drejtorinë e Përgjithshme të Policisë së Shtetit” tha Vasili.
Ai kujtoi se strukturat e hetimit të Policisë së Shtetit do të rekrutojnë 100 studentë që kanë përfunduar universitetin me rezultate të larta në degët Ekonomik, Juridik dhe Teknologji Informacioni dhe afati i aplikimit përfundon më 15 shtator. Fituesit do të marrin gradën policore Nënkomisar. /Opinion.al
