Banorët e një qyteti të vogël në Meksikën qëndrore, ditën e Krishtlindjeve, 25 dhjetor, u zgjuan duke gjetur gjashtë koka të prera të lëna nga bandat kriminale të drogës në mes të rrugës.
Mediat lokale bëjnë të ditur se, pranë kokave autoritetet gjetën një mesazh të shkruar në një copë kartoni, por nuk e publikuan përmbajtjen e mesazhit.
Sipas raportimeve të medias, 6 kokat, të cilat u përkisnin burrave të rinj në moshë, u gjetën në Hikulipan, një qytet me rreth 50 mijë banorë, në shtetin e Mikoaçanit.
“Ngjarja është pasojë e një lufte për territor mes bandave kriminale”, thanë autoritetet për mediat.
Policia, bëri me dije, se niveli i sigurisë në rrugë është rritur, nëpër qytet policia ka ngritur postblloqe dhe vënë në lëvizje patrulla të shumta për të shmangur një kundërpërgjigje nga banda rivale.
Bandat kriminale, në luftë për të okupuar territore ose edhe zona me bimë narkotike, shkaktojnë krime horror shpesh në Meksikë, sipas studiuesve të krimit penal në vend.
