Pas tërmetit shkatërrues, i cili la pas dhjetëra viktima, ministrja e Arsimit, Besa Shahini, në një konferencë për shtyp, njoftoi se mësimi në Qarkun Durrës do të pezullohet deri në 9 dhjetor, ndërkohë që në Qarkun Tiranë dhe Lezhë pezullohet deri në 5 dhjetor.
Gjatë fjalës së saj, Shahini tha se do të bëhet dhe inspektimi i ambienteve shkollore për të parë nëse kanë pësuar dëmtime nga tërmeti 6.4 ballë. Gjithashtu, ajo shtoi se mësuesit duhet të shkojnë në punë që nesër, për të krijuar një ambient të ngrohtë për rikthimin e nxënësve në shkollë.
“Në Qarkun Durrës mësimi pezullohet deri në 9 dhjetor. Në Qarkun Tiranë dhe Lezhë mësimi do jetë i pezulluar deri më datë 5 dhjetor, por ruajmë mundësinë ta shtyjmë edhe për disa ditë të tjera në rast se nuk sigurohemi që të gjitha shkollat në gjendje të sigurt. Në të gjitha qarqet e tjera mësimi fillon normalisht. Mësuesit i presim në punë nga nesër”, tha Shahini./ Opinion.al
