Nga tërmeti në Itali, janë nxjerrë të gjallë nga rrënojat edhe dy vëllezërit e mitur të foshnjes 7 muajshe e cila u nxor prej rrënojave disa orë më parë.
Skuadrat e shpëtimit kanë arritur të nxjerrin nga rrënojat e banesës fëmijët e moshës 4 dhe 6 vjeç.
“Ka qenë një natë e tmerrshme, nuk kam fjalë për ta shpjegur,”-është shprehur baba i fëmijëve. “Unë isha në kuzhinë, ndërsa fëmijët në dhomën e tyre. Gruaja ime ishte në banjo dhe arriti që të dilte nga dritarja. I gjithë kati i parë shtëpisë është rrëzuar dhe na kanë shpëtuar zjarrfikësit.”
Tërmeti goditi ishullin italian të Iskias mbrëmjen e djeshme. Deri tani kanë mbetur të vdekura dy gra dhe 39 persona të tjerë janë plagosur, raporton BBC.
Tërmeti i magnitutës 4.0 goditi Ishullin Iskia në orën 20:57 mbrëmjen e së hënës (21 gusht) dhe u dëmtuan ndërtesa të shumta përfshirë një kishë dhe spital.
Ishulli, jashtë brigjeve të Napolit, ka një popullsi prej rreth 50,000 banorësh dhe është shumë popullor me turistët. Shumë njerëz po hanin në restorante, kur tërmeti goditi, në një thellësi prej rreth 5 km (3 milje) në veri të komunës së Casamicciola.
