Luigi Soreca, ambasadori i BE në vendin tonë ka folur në lidhje me situatën e vështirë që po kalon Shqipëria pas goditjes së tërmetit 6.4 ballë.
Në një prononcim për media, Soreca është shprehur se Bashkimi Europian dhe organizmat ndërkombëtarë gjenden pranë shqiptarëve në këto momente të vështira për ta.
Ambasadori i BE deklaroi se në Shqipëri kanë mbërritur 50 inxhinierë të cilët janë dërguar posaçërisht nga Bashkimi Europian.
“Ne jemi këtu për të treguar mbështetjen dhe solidaritetin tonë. Është koha që qytetarët shqiptarë ta kuptojnë se po bëhet gjithçka për ta në terren. Jemi një ekip prej 50 inxhinierësh që janë në Durrës dhe në zona të tjera të vendit të prekura nga tërmeti. Inxhinierët do të vlerësojnë dëmet dhe më pas do jepen vlerësimet. Qytetarët shqiptarë duhet të kuptojnë se cilat janë banesa të sigurta e cilat jo”, tha Soreca.
Tërmeti shkatërrues goditi vendin në orët e para të mëngjesit të së martës, duke lënë pas dhjetëra viktima, qindra të plagosur dhe dëme të shumta materiale./ Opinion.al
