Shtetet e Bashkuara të Amerikës thonë se Rusia ka shtuar 7000 trupa përgjatë kufirit me Ukrainën.
CCN shkruan se kjo është në kontrast të drejtpërdrejtë me pretendimet e Rusisë se ka tërhequr trupat e saj.
Akuzat nga Shtetet e Bashkuara u bënë të mërkurën në mbrëmje, ndërsa një zyrtar i lartë i administratës tha se rritja e trupave dëshmon se pohimi i Rusisë për tërheqje është “i rremë” dhe sugjeron se hapja publike e Presidentit Vladimir Putin ndaj diplomacisë është një maskë.
“Çdo tregues që kemi tani është se ata synojnë vetëm të flasin publikisht dhe të bëjnë pretendime për reduktimin e përshkallëzimit, ndërkohë që mobilizohen për luftën”, tha zyrtari i cituar nga CNN.
Shifrat e reja të së mërkurës nënkuptojnë se totali i forcave ruse në kufi tani tejkalon shifrën prej 150,000 që Presidenti Biden citoi në një fjalim televiziv në fillim të kësaj jave.
Të martën, Biden tha gjatë një fjalimi në Dhomën Lindore se një tërheqje e trupave ruse do të ishte e mirë, por ai ende nuk kishte parë ndonjë provë që një tërheqje e tillë ishte duke u zhvilluar.
“Analistët tanë tregojnë se ata mbeten në një pozicion kërcënues,” tha Biden.
Më herët gjatë javës, Putin tha se Rusia po tërhiqte disa trupa nga kufiri i Ukrainës në bazë pas përfundimit të stërvitjeve në Krime, territori ukrainas i aneksuar nga Rusia në 2014.
Udhëheqësit e Europës dhe SHBA, megjithatë, dyshuan për një pretendim të tillë.
Sekretari i Përgjithshëm i NATO-s, Jens Stoltenberg tha se aleanca nuk kishte parë ende “asnjë shenjë të de-përshkallëzimit të konfliktit në terren./Opinion.al
