Njëri prej personave që dhunuan mësuesin në Tepelenë është arrestuar ditën e sotme.
Policia bën me dije se në pranga ka rënë shtetasi A. G., 29 vjeç, ndërsa në kërkim janë shpallur dy bashkëpunëtorët e tij.
Po ashtu në një njoftim për mediat policia sqaron se është ndaluar edhe vetë mësuesi i Edukimit Fizik, 59 vjeçari Kleanth Laçi, për veprat penale “Ngacmimi seksual” dhe “Kallëzimi i rremë”. Ndalimi i tij u bë pasi nga kallëzimet e marra, dyshohet se ka ngacmuar seksualisht 2 vajza të mitura.
“Gjithashtu, në vijim të veprimeve hetimore, nga specialistët e Seksionit për Hetimin e Krimeve në Komisariatin e Policisë Tepelenë u bë ndalimi i shtetasit të dëmtuar K. L., 59 vjeç, për veprat penale “Ngacmimi seksual” dhe “Kallëzimi i rremë”. Ndalimi i këtij shtetasi u bë pasi nga kallëzimet e marra në lidhje me këtë rast, dyshohet se ai ka ngacmuar seksualisht 2 shtetase të mitura”-thuhet në njoftimin e policisë.
Materialet procedurale i kaluan Prokurorisë pranë Gjykatës së Rrethit Gjyqësor Gjirokastër, për veprime të mëtejshme.
