Duket se humbja e kontrollit të mjetit tip Mercedes nga ana e drejtuesit të tij, ka qenë shkak për aksidentin e trefishtë në Tepelenë ku 4 persona humbën jetën dhe dy të tjerë u plagosën.
Mjeti tip Mercedes ka dalë në korsinë e kundërt dhe duke u përplasur me automjetin “Toyota Yaris”, ndërsa në aksident është përfshirë edhe drejtuesi i mjetit “BMË” që ndodhej pas tij. Policia njoftoi se dy nga viktimat janë burrë e grua. “Rreth orës 19:00, në aksin rrugor Tepelenë-Memaliaj, automjeti tip “Benz” me drejtues shtetasin R. R., 42 vjeç, banues në Luftinjë, është përplasur me automjeti tip “Toyota” me drejtues shtetasin L. B., 62 vjeç, banues në Memaliaj. Në aksident është përfshirë edhe automjeti tip “BMV” me drejtues shtetasin E. P., banues në Gjirokastër, që qarkullonte pas automjetit tip “Toyota”. Si pasojë e përplasjes së automjeteve kanë humbur jetën shtetasit R. R. dhe L. B., si dhe 2 pasagjeret që ndodheshin në automjetin tip “Toyota”, shtetaset L. B., rreth 57 vjeçe (bashkëshortja e shtetasit L. B.) dhe A. B., rreth 85 vjeçe”, njoftoi policia. Lidhur me ngjarjen ka reaguar edhe Ministri i Brendshëm Taulant Balla, i cili tha se Policia Rrugore duhet të rrisë edhe më shumë kontrollet dhe forcën parandaluese. “I pikëlluar për humbjen e katër jetëve dhe dy të plagosur në aksidentin tragjik të natës së sotme pranë Tepelenës. Zbatimi i rregullave të qarkullimit rrugor nga përdoruesit e rrugës është detyrim ligjor e përgjegjësi ndaj jetës. Ndërsa Policia Rrugore duhet të rrisë edhe më shumë kontrollet dhe forcën parandaluese”, thuhej në reagimin e Ballës./Opinion.al
