Prokuroria ka nxjerrë urdhër-arresti për ish-kryebashkiakun e Vorës, Agim Kajmaku dhe tashmë ai është në kërkim.
Megjithatë mashtrimi në formularin e dekriminalizimit është vetëm një nga arsyet për të cilat Kajmaku po ndiqet penalisht. Ndaj tij janë ngritur edhe dy akuza të tjera, ajo e shpërdorimit të detyrës dhe e ushtrimit të funksioneve pas dhënies fund të detyrës.
Këto dy akuza lidhen me shkarkimet që ai i bëri zëvendës kryetarëve të Bashkisë së Vorës Aqif Mucën dhe Laureta Omerin dhe në vend të tyre emëroi vetëm një nënkryetar bashkie, shefin e tij të kabinetit, Gent Picari.
Në këto kushte, Këshilli bashkiak është i detyruar ta caktojë Picarin, të besuarin e Kajmakut, në krye të bashkisë.
Kjo lëvizje e tij u cilësua si marrje e kontrollit të Bashkisë duke ja ‘hequr’ nga duart Partisë Socialiste.
“Prokuroria e Rrethit Gjyqësor Tirane, ka shpallur në kërkim me masë sigurimi me arrest në burg, në lidhje me hetimin që zhvillohet në ngarkim të shtetasit Agim Kajmaku, i dyshuar për kryerjen e veprave penale, shpërdorim detyre, sipas nenit 248 te Kodit Penal, falsifikimi i formularëve, neni 190 i Kodit Penal, dhe Ushtrim i funksioneve pas dhënies fund të detyrës, neni 249 i Kodit Penal”, thuhet në urdhër-arrestin për Kajmakun. /Opinion.al
