Nëna e dy vajzave binjake të cilat tentoi t’i mbyste, dha një deklaratë shokuese dje, teksa ishte në gjyq. Me justifikimin se ishin vajzat e saj, ajo kishte të gjithë të drejtën edhe t’ua merrte jetën. Admir Murataj, është personi i cili ka rrëfyer të gjithë ngjarjen e rëndë, pasi ai ka shpëtuar dy vajzat.
Murataj ka treguar se nëna ka tentuar që të mbysë dhe veten. “Nëna po tentonte të mbyste vajzat, dhe veten. U hodha në lumë me një person tjetër, për t’i shpëtuar. Isha për peshkim kur pashë ngjarjen”, mësohet të ketë thënë ai për News24.
“Më qëllonte në duar që t’i lëshoja vajzat. Pasi i shpëtova tentoi t’i mbyste me duar,” ka thënë Murataj.
Rudina Kishta, me gjakftohtësinë më të madhe kishte tentuar që të mbyste në lumin Seman dy vajzat e saj 6 vjeçare, por ishin shpëtuar rastësisht nga një peshkatar.
Ngjarja ka ndodhur në 13 gusht, ku në fshatin Grecalli të Fierit, 42-vjeçarja pas sherrit me bashkëjetuesin, i vuri flakën shtëpisë dhe u largua.
Para nisjes së seancës, ajo u është përgjigjur pyetjeve të gazetarëve të Fierit.
Pse tentove të mbysje fëmijët? Rudina është përgjigjur: “Janë fëmijët e mi në fund të fundit. Të vinit e të shikonit ku rrija unë, s’kam kushte. Burri me të cilin bashkëjetoja prej 6 muajsh dhe jo dy ditë, siç ka deklaruar ai, më dhunonte mua dhe fëmijët”.
Po ashtu, ajo ka pranuar edhe zjarrvënien e qëllimshme të banesës së bashkëjetuesit, pas një konflikti mes tyre.
Gjykata ka caktuar masën “arrest me burg” për 42-vjeçaren, që i vuri flakën shtëpisë, dhe tentoi të mbyste në lumë dy vajzat e saj të mitura.
