Deputetja e Partisë Demokratike, Jorida Tabaku ka reaguar në lidhje me tensionet në Veri të Kosovës që filluan mbrëmjen e djeshme, për shkak të marrëdhënies së reciprocitetit që duhet të hynte në fuqi sot.
Nëpërmjet një postimi në “Facebook”, Tabaku tha se ngjarjet e djeshme në Kosovë tregojnë qasjen problematike që ka Serbia ndaj Ballkanit Perëndimor.
Vendimin e Kosovës për të shtyrë për 30 ditë reciprocitetin, Tabaku e shikon si një akt pozitiv, të mbështetur nga aleatët strategjikë si SHBA dhe BE por edhe si një veprim të mbështetur gjerësisht nga politika në Kosovë.
Ndërkohë, nga ana tjetër, deputetja i bën thirrje parlamentit shqiptar që të jetë pranë qeverisë së Kosovës jo vetëm me rezoluta.
“Shqiptarët sot i kanë sytë dhe zemrat e tyre nga Kosova!
Ngjarjet e djeshme në Kosovë tregojnë edhe një herë qasjen problematike që ka Serbia ndaj Ballkanit Perëndimor.
Prej vitit 2008 Kosova mbetet një realitet që nuk mund të ndryshohet ndaj çdo përpjekje që përpiqet të zhbëjë këtë realitet provokon vetëm trazira.
Veprimi i qeverisë së Kosovës për të shtyrë për 30 ditë reciprocitetin është një akt pozitiv jo vetëm se është i mbështetur nga aleatët tanë strategjikë si SHBA dhe BE por sepse është një veprim i mbështetur gjerësisht nga politika në Kosovë.
Nga ana tjetër e gjej të domosdoshme të kërkoj vëmendjen e parlamentit shqiptar dhe mbi të gjitha qeverisë duke i kujtuar që nuk mund të mjaftohet vetëm me rezoluta por duhet të jetë aty pranë qeverisë së Kosovës në çdo moment.
Në këto kohë të turbullta gjuha e urrejtjes dhe gjuhae papranueshme nuk mund t’i shërbejë qetësisë dhe bashkëjetesës në Ballkanin Perëndimor. Shqiptarët sot i kanë sytë dhe zemrat e tyre nga Kosova”, shkruan Tabaku.
