Ministria e Punëve të Jashtme të Shqipërisë ka reaguar në lidhje me deklaratat e fundit të diplomacisë greke, ku kërcënonte Shqipërinë me bllokim të procesit të integrimit në BE.
Bëhet fjalë për një reagim të MPJ-së greke për situatën në Himarë. Diplomacia greke ka reaguar ashpër të shpronësimet në Himarë duke kërcënuar edhe me veto procesin integrues të Shqipërisë.
Për këtë rast, MPJ-ja shqiptarë ka reaguar duke thirrur për sqarime ambasadorin grek në Shqipëri. MPJ-ja i ka cilësuar si të cekëta deklaratat e MPJ-së greke.
Reagimi i MPJ-së shqiptare
Është rasti të themi se habia pason habinë kur bëhet fjalë për qëndrimet e MPJ greke. Tonet kërcënuese të deklaratës dhe njohja e cekët e situatës dhe rrethanave, nuk mund të mirëkuptohen në Europën e sotme, përveçse si një mesazh i destinuar për konsum të brendshëm.
Shqipëria nuk bën dallime në respektimin e parimeve të shtetit të së drejtës.
Procedurat ligjore të ndjekura nga Bashkia Himarë, që kanë në fokus shndërrimin e qytetit të Himarës në një destinacion turistik europian, janë transparente dhe në përputhje me legjislacionin në fuqi.
Deklaratat e përseritura të MPJ greke dhe gjuha anakronike për Himarën janë të papranueshme dhe në kundërshtim me parimet themelore të shtetit të së drejtës. Parime të cilat orientojnë veprimtarinë e institucioneve të shtetit shqiptar.
Bazuar në sa më siper e në pajtim me praktikat diplomatike, Ministria e Puneve të Jashtme ka thirrur për sqarime Ambasadoren e Greqise ne Tirane duke shprehur qëndrimin e mësipërm.
