Partia Demokratike prej ditësh akuzon Taulant Ballën se i ka thënë tendera dhe koncesione mikut të tij, trafikant droge, Edmond Bego. Kujtojmë se njeriu me 5 emra EDMOND BEGO, alias MANOLI BEGO, alias SAJMIR SINA, alias BELUL GJATARI, alias Mond BEGA u ndalua në Greqi, teksa kthehej nga pushimet në Korfuz. Ai u mbajt tre ditë në paraburgim për shkak të një dënimi në Itali me 21 vite burg, por më pas u la i lirë, pasi rezultoi se kishte shlyer dënimin në Shqipëri. Edhe pse Italia e kishte dënuar me 21 vite burg për trafik droge, në Shqipëri iu ul dënimi nga Gjykata e Lartë në 4 vite burgim. As ato nuk i bëri të plota pasi 2 vite ia fali Gjykata e Krujës. Që nga nëntori i 2011 kur fitoi lirinë, Edmond Bego nisi aktivitetin tregtar dhe sot jeton si biznesmen në Shqipëri.
Prej 10 ditësh Partia Demokratike akuzon se Taulant Balla është miku i Edmond Begos dhe ish-trafikanti dhe ish-anëtari i bandës së Lushnjes ka perfituar para nga fondet publike.
Kreu i grupit të PS, në fillim tha se e njihte Begon familjarisht, por shtoi se nuk i kishte dhënë asnjë mbështetje.
PD-ja vazhdon të publikojë dokumente të tenderave e koncesioneve që Bego ka marrë në qarkun e Elbasanit, ku është deputet Taulant Balla. Sot, demokrati Ervin Salianji tha se “Edmond Bego, miku trafikant droge me 5 emra i Taulant Ballës ka marrë leje minerare pa garë. “Sipas lejes që ka firmosur Damian Gjiknuri, miku trafikant droge i Taulant Ballës, ka të drejtë të shfrytëzojë për 25 vjet pasuritë natyrore në interes të biznesit të tij të ndërtimit, i cili duhet të ishte tani nën sekuestro nga prokuroria”, tha Salianji.
Sakaq, Taulant Balla refuzoi të kthejë një përgjigje nëse ka përfituar Edmond Bego për shkak të lidhjes së tyre shoqërore. Në një status në facebook, kreu i grupit të PS shkruan:
“Vëmendja jonë është tek ju njerëzit e zakonshëm të këtij vendi dhe para vetëm jush ne japim llogari. Merrni pak kohë dhe hidhini një sy përmbledhjes së punës sonë në Kuvend gjatë vitit të parë të mandatit tonë të dytë”.
/Opinion.al
