Deputeti Myslym Murrizi dhe ministri i Brendshëm Sandër Lleshaj janë përfshirë në një debat ditën e sotme në Kuvend.
Shkak është bërë denoncimi i deputetit në lidhje me një tender që ishte kryer nga Ministria e Brendshme për veshjet, në kohë pandemie.
Murrizi tha se bëhet fjalë për një tender me vlerë 23 milionë euro, që sipas tij u shkurtuan njësitë e artikujve dhe jo shifra e tij. Ai i bëri thirrje SPAK që të hetojë në lidhje me këtë çështje.
Ndërkohë, ministri Lleshaj e sfidoi deputetin duke i thënë se t’i çonte provat në Prokurori dhe të vërtetohet denoncimi.
Debati në Kuvend
Myslym Murrizi: Po kjo firmë, ku në 2013 nga ju u thatë shqiptarëve se do e denoncojmë, por po kjo firmë me ministrat tuaj të mbrojtjes mori 45 mln euro. Para 15 ditësh i thatë 23 mln euro uniformat e ministrisë së brendshme me 30% artikuj më pak. Ftoj SPAK-un të mos flejë gjumë. Buxheti të mos përfundonte në xhepat atyre që iu njohin xhepat. Jo vetëm kjo ministri, por edhe objektet e tenderimeve të shëndetësisë, apo e Mbrojtjes, apo agjenci të tjera duhet të jenë objekt hetimi i SPAK-ut.
Sandër Lleshaj: Zoti Murrizi po të ishit mjaftuar me pjesën e dytë të fjalës suaj do të isha dakord që të merreshin prokurorët, por ju e bëtë vetë prokurorin në fillim. Nuk i di ato që thatë se nuk merrem me shifra, tendera dhe firma, apo sozi. Po do ju ftoja të shkoni të trokisni atje te prokuroria dhe kështu zgjidhet puna dhe lërini ata ta bëjnë prokurorin. Unë refuzoj të merrem me këtë dhe sfidoj këdo që i thotë vetes shqiptar që të gjejë edhe një nanogram lidhje mes atyre pisllëqeve që përmende dhe figurës time. Nuk ka lidhje, ju sfidoj të trokisni në prokurori.
Myslym Murrizi: Zoti Lleshi, nuk thashë që keni firmosur ju tendera, e si që nuk ju pyesin, unë e di kush është shefi juaj i tenderave te ministrinë tate, por unë guxoj dhe flas, ty nuk e di kush ta ka kafshuar gjuhën. Jam i qartë që nuk besoj të ketë trokitur ndonjë kokërr leku në xhepin tata, flasin shumë që ti je në gjumë kur vijnë paratë në ministri. Ju keni kryetar i komisionit të tenderave në ministri? Jo, pra jo, po të kem gjë për ty nuk më dridhen leqet e këmbëve ta them./ Opinion.al
