Mbi 550 pelegrinë kanë vdekur gjatë Haxhit, pasi temperaturat përvëluese kapluan Mekën këtë vit.
Të paktën 323 nga ata që vdiqën ishin egjiptianë, ku shumica prej tyre shfaqën shqetësime që lidheshin me nxehtësinë.
“Të gjithë egjiptianët vdiqën për shkak të nxehtësisë” përveç njërit që pësoi lëndime vdekjeprurëse gjatë një përplasjeje të vogël të turmës, tha një nga diplomatët, duke shtuar se shifra totale erdhi nga morgu i spitalit në lagjen Al-Muaisem të Mekës.
Vdekjet e reja e çojnë totalin e raportuar deri më tani nga shumë vende në 577, sipas një raporti të AFP.
Diplomatët thanë se totali në morgun në Al-Muaisem, një nga më të mëdhenjtë në Mekë, ishte 550.
Më herët të martën, ministria e jashtme e Egjiptit tha se Kajro po bashkëpunonte me autoritetet saudite në operacionet e kërkimit për egjiptianët që ishin zhdukur gjatë haxhit.
Autoritetet saudite kanë raportuar se kanë trajtuar më shumë se 2,000 pelegrinë që vuajnë nga i nxehti, por nuk e kanë përditësuar këtë shifër që nga e diela dhe nuk kanë dhënë informacion mbi viktimat.
Të paktën 240 pelegrinë u raportuan të vdekur nga vende të ndryshme vitin e kaluar, shumica prej tyre indonezianë.
Haxhi është një nga pesë shtyllat e Islamit dhe të gjithë muslimanët duhet ta kryejnë të paktën një herë.
Pelegrinazhi ndikohet gjithnjë e më shumë nga prishja e klimës, sipas një studimi saudit të publikuar muajin e kaluar që tha se temperaturat në zonën ku kryhen ritualet po rriteshin me 0.4C (0.72F) çdo dekadë.
Temperaturat arritën 51.8 Cat në Xhaminë e Madhe në Mekë të hënën, tha qendra kombëtare e meteorologjisë saudite.
Zyrtarët sauditë i kishin këshilluar pelegrinët të përdorin çadra, të pinë shumë ujë dhe të shmangin ekspozimin në diell gjatë orëve më të nxehta të ditës.
Por shumë nga ritualet e haxhit, duke përfshirë lutjet në malin Arafat që u zhvilluan të shtunën, përfshijnë qëndrimin jashtë për orë të tëra gjatë ditës.
Rreth 1.8 milionë pelegrinë morën pjesë në haxh këtë vit, 1.6 milionë prej tyre nga jashtë, sipas autoriteteve saudite.
Vende të tjera që raportojnë vdekje gjatë haxhit këtë vit përfshijnë Indonezinë, Iranin dhe Senegalin.
