Strukturat e sektorit energjetik kanë shtuar gatishmërinë në rang kombëtar për të minimizuar problematikat e furnizimit me energji elektrike në kushtet e temperaturave të larta dhe rritjes së konsumit.
Operatori i Sistemit të Transmetimit (OST) dhe Operator i Shpërndarjes së Energjisë Elektrike (OSSH) po bashkëpunojnë ngushtësisht për të eleminuar pasojat që sjell mbingarkesa në rrjet dhe për të rikthyer në funksionim të shpejtë pajisjet e dëmtuara.
Një nga rastet më të fundit ishte stakimi i linjës 110kV Elbasan-Kusath, si pasojë e një defekti në transformatorin e rrymës. Falë ndërhyrjes në kohë të brigadave të OST, pajisja u zëvendësua menjëherë dhe linja u rikthye në punë.
Një tjetër problem u regjistrua në nënstacionin 110/35kV në Bistricë, ku defekti në transformator solli ndërprerje të energjisë për 15 minuta në dy nënstacionet e Sarandës dhe Gjirokastrës. Edhe në këtë rast, grupet e OST dhe OSSH ndërhynë menjëherë, duke zëvendësuar pajisjen në pronësi të kompanisë Kurum dhe rikthyer sistemin në funksion të plotë.
Ndërkohë, një zjarr që përfshiu transformatorin e fuqisë 110/10kV në nënstacionin e Ibës në Tiranë, shkaktoi ndërprerje të energjisë në disa zona. Furnizimi u rikthye brenda një kohe të shkurtër përmes skemës unazë, ndërsa brigadat teknike punuan pandërprerë për të rivënë nënstacionin në punë, i cili u kyç dhe rikthye në regjim normal këtë të shtunë rreth orës 11:00.
Kujdes të veçantë ka kërkuar edhe stakimi i linjës 400kV Zemblak-Kardia, për shkak të një zjarri në territorin grek, pranë nënstacionit Kardia, si dhe problematikat në linjën 150kV Bistricë-Mourtos. Megjithatë, konsumatorët nuk janë prekur nga këto ndërprerje, pasi furnizimi u sigurua përmes linjave paralele.
OST njofton se mbetet në kontakt dhe koordinim të vazhdueshëm me homologët grekë për rikthimin në funksion të linjave të dëmtuara.
Autoritetet bëjnë apel për mirëkuptim në zonat ku për arsye sigurie, për shkak të zjarreve, mund të jetë e nevojshme ndërprerja e përkohshme e energjisë.
