Presidenti i Ukrainës, Volodymyr Zelensky, ka reaguar pas bisedës telefonike mes Presidentit të SHBA-së, Donald Trump, dhe Presidentit rus, Vladimir Putin, lidhur me të ardhmen e luftës në Ukrainë.
Në një deklaratë për mediat, Zelensky theksoi se Ukraina “nuk do të jetë në gjendje të pranojë asnjë marrëveshje” që bëhet pa pjesëmarrjen e saj direkte. Ai nënvizoi rëndësinë e shmangies së një skenari që do t’i lejonte Rusisë të diktonte kushtet e negociatave, duke bërë që bisedimet të zhvilloheshin vetëm mes Moskës dhe Uashingtonit.
Presidenti ukrainas shtoi se nuk e sheh telefonatën e Trump-it me Putinin si një shenjë se dialogu me Rusinë është prioritet për liderin amerikan. Megjithatë, ai pranoi se një veprim i tillë nuk është “shumë i këndshëm” për Ukrainën. “Nuk mund të ketë bisedime për Ukrainën pa Ukrainën”, tha ai, duke theksuar se edhe vendet evropiane duhet të jenë pjesë e tryezës së negociatave.
Zelensky tha gjithashtu se gjatë komunikimit të tij me Trump-in, ai e kishte bërë të qartë se prioriteti i Ukrainës mbetet sigurimi i garancive të sigurisë. Sipas tij, këto garanci nuk mund të ekzistojnë pa mbështetjen e Shteteve të Bashkuara.
