Presidenti rus Vladimir Putin i tha të premten kancelarit gjerman Olaf Scholz se Rusia ishte e gatshme të rishikonte marrëveshjet e energjisë nëse Berlini ishte i interesuar, ka zbuluar Kremlini.
Raportohet se në bisedën e tyre të parë telefonike që nga dhjetori 2022, të dy liderët kishin një “shkëmbim të detajuar dhe të sinqertë të pikëpamjeve” për Ukrainën dhe se Putini kishte vendosur të njëjtin pozicion që ai ka deklaruar prej muajsh: çdo marrëveshje paqeje duhet të adresojë interesat e sigurisë së Moskës dhe të bazohet në “realitetet e reja territoriale”.
Putin foli gjithashtu për një “degradim të paprecedentë” në marrëdhëniet midis dy vendeve, për të cilin ai fajësoi veprimet jomiqësore të Gjermanisë, thuhet në deklaratën e Kremlinit, sipas Reuters.
“U theksua se Rusia ka përmbushur gjithmonë në mënyrë rigoroze traktatet dhe detyrimet kontraktuale në sektorin e energjisë dhe është e gatshme për bashkëpunim reciprokisht të dobishëm nëse pala gjermane tregon interes për këtë.”
Gjermania ishte shumë e varur nga gazi rus përpara luftës, por dërgesat direkte pushuan kur tubacionet Nord Stream nën Detin Baltik u hodhën në erë në vitin 2022.
Gjermania dhe vende të tjera të Bashkimit Evropian kanë vendosur valë të njëpasnjëshme sanksionesh ndaj Rusisë për shkak të luftës dhe kanë ndërmarrë hapa për të hequr qafe varësinë e tyre nga nafta dhe gazi rus.
Për Ukrainën, Kremlini tha se qëndrimi i Putinit ishte ai që ai deklaroi në qershor, kur tha se lufta mund të përfundonte nëse Kievi hiqte dorë nga ambiciet e tij për NATO-n dhe dorëzonte tërësinë e katër rajoneve të pretenduara nga Rusia. Ukraina i hodhi poshtë këto kushte si të barasvlershme me dorëzimin.
“Marrëveshjet e mundshme duhet të marrin parasysh interesat e Federatës Ruse në fushën e sigurisë, të dalin nga realitetet e reja territoriale dhe më e rëndësishmja, të eliminojnë shkaqet rrënjësore të konfliktit”, tha Kremlini.
