Tërmeti i fuqishëm që shkundi sot vendin dëmtoi një sërë ndërtesash private por edhe shtetërore siç ishte Ministria e Bujqësisë apo Kryesia e Kuvendit. Por termeti nuk dëmtoi godinën më të debatuar sot në vend Teatrin Kombëtar.
E pikërisht, këtu e merr frymëzimin aktori Neritan Licaj i cili në sheshin e protestës, tha se “ky ishte mesazh per Ramën”.
“Ekzistenca ime varet nga unë dhe vetëm ai lart, ai lart sot dërgoi një shenjë shumë të bukur mbi të gjitha për Ramën, në ditën e ditëlindjes së tij. Ajo shenjë ishte që kjo nëna jonë e vjetër e plakur na doli më e fortë se ato nuset e reja, parlamenti, ministritë”, tha Licaj.
“Lart në qiell është Nënë Tereza që ka një shenjë të bukur: Kemi harruar se i përkasim njëri-tjterit prandaj nuk gjejmë paqe. Këtë i them ta mbajë vath në vesh edhe kryeministri.
Deputetë, më bëni të ndihem krenar që përfaqësohem nga ju. I jeni betuar, flamurit, kombit e kushtetutës. Nesër do të tregoni si do të votoni, si deputetë dhe shpresë e popullit apo njerëz partiakë. Gjithë populli po ju vëzhgon. Nesër nga ju varet Teatri, kuptoni rëndësinë e këtij vendi,” tha më tej Liçaj.
