Pas mbledhjes së qeverisë, ka folur për mediat ministrja e Shëndetësisë dhe Mbrojtjes Sociale Albana Koçiu. Ajo deklaroi se po punohet për furnizimin e qendrave spitalore me barna për të sëmurët me tumor dhe i gjithë procesi do jetë nën monitorim të vazhdueshëm.
“QSUT ka kryer gjithë procedurën për të pajisur pacientët me këto barna, sidomos citostatikët që janë tejet të rëndësishme për trajtimin e tyre. Furnizimi me barna është një nga proceset më komplekse të administratës, është edhe lista e barnave të rimbursueshme duke u dhënë mundësi qytetarëve që të trajtohen gjatë ecurisë së sëmundjes. Aktualisht që flasim janë nënshkruar marrëveshje për furnizimin e qendrave spitalore dhe ne do i monitorojmë”, deklaroi ministrja.
E pyetur se pse u rrëzua dje amendamenti për minimumin jetik, Koçiu tha se opozita nuk e kishte vlerësuar siç duhet. Për më tepër sipas ministres, në focus janë programet e aftësimit të individëve për t’i integruar në tregun e punës.
“Siç e dini qeveria ka përgatitur bonusin dhe është duke punuar për një reformë të thellë për pensionet. Ne rrëzuam dje një amendament të kërkuar nga opozita, në gjykimin tonë nuk është i vlerësuar siç duhet, duhet të biem dakord për mënyrën si matet minimumi jetik dhe më pas të vendosim kush janë familjet që kanë nevojë për mbështetje. Të gjithë ata që janë të varfër duhet të aftësohen për t’u integruar në tregun e punës. Politikat tona sociale janë të mbështetura në fuqizimin e individëve të shoqërisë, jemi duke zbatuar politika e programe aftësi e rehabilitimi për ata që kanë nevojë dhe të hidhen në treg pune me qëllim që të fuqizojnë familjen e tyre dhe të mos krijojnë cikle të përsëritura të varfërisë”, tha Koçiu.
