Gjyqtarët dhe Prokurorët e shkarkuar nga Vetting-u kanë krijuar një shoqatë e quajtur “Drejtësi për Drejtësinë”.
Ata i kanë dërguar një letër Avokatit të Popullit që të verifikojë procedurën e përzgjedhjes dhe dokumentacionin e anëtarëve të organeve të vetting-ut.
Ata shprehen se ajo duhet të bëjë verifikime dhe nëse “konstaton shkelje ligjore të aplikantëve dhe për rrjedhojë kushtet të pavlefshmërisë në emërimin e tyre, të ndjekë hapat e duhur ligjor dhe kushtetues, të Informojë Kuvendin, të kërkojë pavlefshmërinë e emërimit të tyre, si dhe kur është rasti të çojë për ndjekje penale personat që kanë paraqitur dokumentet të falsifikuar”.
Shoqata thotë se nga verifikimi që ata i kanë bërë dokumentacioneve të paraqitura nga disa anëtarë të organeve të vetting-ut, kanë dalë në konkluzionin se një pjesë e mirë e aplikantëve që sot janë emëruar në organet e rivlerësimit kanë gënjyer dhe kanë paraqitur dokumenta të paplota dhe të pasakta.
Një prej emrave të cilët ata të kërkojnë shkarkimin është Luan Daci, që sipas të larguarve nga drejtësia “nuk plotëson kushtin të ketë përvojë pune jo më pak se 15 vjet si gjyqtar, prokuror, avokat, profesor i së drejtës, nëpunës i shërbimit civil në nivel drejtues ose në një përvojë të njohur në fushën e së drejtës administrative ose sfera të tjera të së drejtës”.
E njëjta gjë është edhe për anëtarin e KPA, Ardian Hajdari. Në shkresë thuhet se “zgjedhja e antarit të Kolegjit të Posaçëm të Apelimit Ardian Hajdari është e paligjshme pasi është shkelur parimi kushtetues pasi ai nuk plotëson kushtin të ketë përvojë pune jo më pak se 15 vjet si gjyqtar, prokuror, avokat, profesor i së drejtës, nëpunës i shërbimit civil në nivel drejtues ose në një përvojë të njohur në fushën e së drejtës administrative ose sfera të tjera të së drejtës”. /Opinion.al
