Angel Di Maria është kërcënuar përsëri nga bandat në Argjentinë. Siç raporton gazeta vendase “Cronica”, ylli i Benfica-s u kërcënua sërish nga disa anëtarë të krimit të organizuar në vendlindjen e tij, Rosario.
Të mërkurën, dy persona me kapuç në një motoçikletë arritën në një stacion shërbimi në jug të qytetit dhe më pas hapën zjarr me qëllimin për të mbjellë terror mes njerëzve.
Sapo u arratisën ata lanë pas një shënim drejtuar sulmuesit 36-vjeçar. “Di Maria të presim. Nënshkruar nga Rosario“, thuhet në shënim.
Një episod shumë i ngjashëm ndodhi edhe pak muaj më parë, kur një mesazh kërcënues e la jashtë shtëpisë së familjes së tij në një fshat të Rosario, ku argjentinasi qëndron zakonisht kur kthehet në atdheun e tij.
“Thojini djalit tuaj të mos kthehet më në Rosario, sepse në të kundërt do të vrasim një anëtar të familjes së tij”, ishte mesazhi kërcënues që morën familjarët e Di Marias në atë kohë.
Kontrata e Di Marias me Benfikën skadon më 30 qershor dhe e ardhmja e tij është ende e pasigurt. Muajt e fundit është folur vazhdimisht që ai të kthehet për të luajtur në atdheun e tij ose të transferohet në MLS, por këto episode sigurisht që nuk do ta ndihmojnë atë të arrijë një vendim me qetësi.
