Nga ora në orë detaje të reja dalin në dritë në lidhje me grabitjen në Rinas. Fillimisht u raportua se grabitësi që u vra nga shkëmbimi i zjarrit ishte pa maskë dhe tullac.
Por më pas u zbulua se kishte vendosur paruke për të ngatërruar policinë. Në trupin e grabitësit të vrarë janë gjetur dy kallëpe dinamit të vendosur në brez, ndërsa në dorë kishte një granatë.
Mësohet se janë lëshuar 4 urdhëra ndalimi, ndërsa 40 persona janë shoqëruar për t’u marrë në pyetje.
Ngjarja
Katër persona të maskuar dhe të armatosur hynë rreth orës 15:00 në pistën e aeroportit të Rinasit dhe grabitën një shumë të konsiderueshme parash. Bëhet fjalë për disa miliona Euro të një banke të nivelit të dytë që u dërguan në një avion të linjës Tiranë – Vienë nga një makinë e kompanisë “Nazeri 2000”.
Grabitësit kanë hyrë me një furgon nga ana e parkingut 24 orësh të pasagjerëve dhe kanë dalë nga një portë në krah të rrugës Rinas – Fushë Krujë, porta e zjarrfikësve, e njëjta nga ku 3 vjet më parë hyri edhe një Mercedes që u përdor për një grabitje të ngjashme. Nën kërcënimin e armëve kanë marrë thasët me para në furgon dhe në pjesën e kargos së avionit.
Autorët për të kryer grabitjen përdorën një furgon të bardhë me mbishkrimin “Kontrolli Tatimor” dhe më pas dolën nga e njëjta portë. Disa pasagjerë të avionit thanë se ata kishin menduar se bëhej fjalë për një stërvitje policore.
Pas rreth 800 metrash pasi kanë dalë nga pista, grabitësit janë përballur me forcat e policisë, të cilat ndodhen të stacionuar pranë aeroportit. Ata kanë qëlluar me armë ndaj efektivëve, të cilët u kundërpërgjigjën. Personi i vrarë është hedhur nga furgoni dhe tre grabitësit e tjerë i janë drejtuar Fushë-Krujës. Në ndjekje janë vënë forca të shumta speciale, ndërkohë që në operacion ka marrë pjesë dhe një helikopter i Ministrisë së Brendshme.
Furgoni me logon e “Hetimit Tatimor” është gjetur i djegur pranë vendit ku mbeti i vrarë grabitësi. Rreth një orë më pas, një tjetër furgon u gjet i djegur mes Kamzës dhe Bathores. Brenda ka pasur një arsenal të rëndë armësh./Opinion.al
