1 orë e 30 minuta ka zgjatur takimi i ministrit të Brendshëm Sandër Lleshaj dhe Drejtorit të Përgjithshëm të Policisë së Shtetit Ardi Veliu me Prefektin e Qarkut Elbasan, Gledian Llatja ,Drejtuesen e Prokurorisë së Rrethit Gjyqësor Elbasan, Enkeleida Millonai, Kreun e SHISH Elbasan, Drejtorin e Drejtorisë Vendore të Policisë Arjan Muça dhe përfaqësues të tjerë të organeve ligjzbatuese.
Në këtë takim mësohet se në fokus të diskutimeve ka qenë ruajtja e rendit dhe goditja e grupeve kriminale, të cilët ushtrojnë veprimtarinë e tyre në qytetin e Elbasanit.
Lleshaj është shprehur se policia duhet të luftojë çdo veprimtari kriminale, duke përgënjeshtruar zërat se bandat kanë mbështetje politike.
Kujtojmë që, vizita e tyre vjen pas shkarkimit të drejtorit të Policisë së Elbasanit, Altin Qato.
Ndërsa, vendin e Qatos e zuri Arjan Muça, shefi i Njësisë Operacionale të Policisë së Shtetit.
Muça ka qenë dhe drejtuesi i njësisë operacionale gjatë arrestimit të Dritan Dajtit në 7 gusht 2009 në Durrës, ku u ekzekutuan katër oficerë policie./ Opinion.al E.Xh.
