Edhe pse forcat serbe rrëmbyen tre policë të Kosovës, Presidenti Aleksandër Vuçiç duke se gëzon ende mbështetje të fortë të ndërkombëtarëve.
Ditën e sotme Vuçiç është takuar me ambasadorët e vendeve të QUINT-it. Lajmi është bërë i ditur nga vet presidenti serb, i cili postoi një foto nga takimi.
Teksa ka hequr çdo përgjegjësi për tensionimin e situatës me Kosovën, Vuçiç u ka kërkuar ambasadorët e vendeve të QUINT-it që të ndalojnë kryeministrin Albin Kurti që të nis një luftë në Ballkan.
“Fola me përfaqësuesit e BE-së dhe vendeve të QUINT-it. U kërkova atyre që të bëjnë çdo gjë që kanë në fuqi dhe të ndalojnë Kurtin që të ndezë një luftë të re në Ballkan”, shkruhej në postimin e Vuçiçit në faqen e tij zyrtare në Instagram.
Kujtojmë që pjesë e vendeve të QUINT-it janë SHBA, Britania e Madhe, Franca, Italia dhe Gjermania.
Ndërkohë tensionet janë rritur sërish në veri të Kosovës pas rrëmbimit të 3 policëve në kufi me Serbinë. Kryeministri i Kosovës ka hedhur akuza ndaj Beogradit zyrtar dhe e ka konsideruar rastin “agresion”. Ai ka bërë thirrje për lirimin urgjent të policëve si dhe reagimin e KFOR e të ndërkombëtarëve pasi rrëmbimi ka ndodhur brenda territorit të Kosovës.
