“Prej kësaj të diele, nis stërvitja shumëkombëshe “Defender Europe 25”, një nga më të mëdha në dekadat e fundit në kontinent. Stërvitja do mbahet në Shqipëri do të zgjasë deri më 9 Qershor”, raporton gazetari Besar Bajraktar.
Komanda Evropiane e SHBA është në krye të këtij operacioni që synon të rrisë gatishmërinë dhe aftësinë për të vepruar në mënyrë të koordinuar ndërmjet forcave të SHBA-së, NATO-s dhe vendeve partnere.
Drejtori i Shtabit të Përgjithshëm të Forcave të Armatosura, Gjeneral brigade Ardian Lilo tregoi për Klan News objektivat e kësaj stërvitjeje.
“Stërvitja që do të zhvillohet për herë të tretë në vendin tonë “Defender Europe ‘25”, është një stërvitje në shkallë të gjerë e organizuar nga Komanda e Ushtrisë Amerikane në Europë. Në Shqipëri do të zhvillohet një nga elementët më të rëndësishëm që është stërvitja “Immediate Response ‘25”. Në objektivat kryesore që do të ketë kjo stërvitje, e para do të jetë deslokueshmëria, aftësia për të lëvizur trupat nga një pikë në një pikë tjetër në kohë të shpejtë. Objektiv tjetër do të jetë të testojë kapacitetet, të certefikojë dhe të rrit gadishmërinë dhe ndërveprueshmërinë mes aleatëve dhe vendeve partnere”, tha Ardian Lilo.
Por sa do të jetë numri i trupave që do të dislokohen në vendin tonë?
“Stërvitja “Immediate Response ‘25” do të ketë 12 mijë trupa nga tetë vende të ndryshme, duke përfshirë vendet rajonale dhe SHBA-të”, tha Ardian Lilo.
Drejtori i Shtabit të Përgjithshëm të Forcave të Armatosura dha më shumë detaje për vendeve ku do të fokusohet kjo stërvitje.
“Do të jetë në Zallherr, ku do të jetë komanda e brigadës shumëkombëshe shqiptare, e cila do të ketë në përbërje trupa ushtarakë amerikanë, trupa të forcës së Sigurisë së Kosovës, pjesëtarë nga Kroacia, Mali i Zi dhe nga Forcat e Armatosura të Republikës së Shqipërisë. Këto do të jenë dislokuara në rajonin e Bizës, forcat, dhe në rajonin Babai i Bokës në Kosovë. Do të kemi përzierje të kapaciteteve, nga elementë të luftimit që do të jenë grupabatalioni i këmbësorisë së lehtë, do të kemi Task Forcën e Kosovës nga FSK-ja, do të kemi elementë xhenier, do të kemi cyber, elementë të kapaciteve ajrore, helikopterë dhe dronë”, tha Ardian Lilo.
Pritet të stimulohet mbrojtja kolektive e aleatëve, ku do të përfshihen trajnime për mbrojtjen e objekteve të rëndësishme, sigurimin e pikave të imbarkimit, operacione sulmuese dhe mbrojtëse në pikat strategjike të Shqipërisë dhe Kosovës. Klan News
