Në plazhin e Durrësit dhe të Lezhës, Task Forca po vijon aksionin për lirimin e hapësirave publike të zaptuara në mënyrë të paligjshme.
Gazetarja e Klan News, Enkeleda Arapi, raporton nga Durrësi për disa nga problematikat që hasen në hapësirat publike të plazhit, ku ndër më të evidentuarat është mungesa e koshave të plehrave, çka ndikon drejtpërdrejt në ndotjen e ambientit.
Sipas raportimit, bashkia e Durrësit është angazhuar për pastrimin e vijës bregdetare, ndërsa theksohet se cilësia e rërës është e mirë dhe nuk ka diferenca të ndjeshme krahasuar me plazhet private.
Ndërkohë, nga Lezha, gazetari Martin Marku bën me dije se aksioni i Task Forcës për lirimin e hapësirave publike në zonat bregdetare vijon që nga dita e parë e nisjes së sezonit.
Vetëm gjatë ditës së sotme, në vijën bregdetare të Ranës së Hedhun janë sekuestruar rreth 250 çadra dhe shezllone të vendosura nga subjekte private që kishin zaptuar hapësira publike në mënyrë të paligjshme.
