Nga 1 prilli, çdo dyqan do të paguajë një taksë vjetore prej 0.2 për qind të vlerës së ndërtesës. Më parë taksa ishte fikse 400 lekë/m2 në vit për zonën Tiranë-Durrës, 300 lekë/m2 në vit për Vlorën, Fierin, Sarandën, Pogradecin, Korçën, Elbasanin, Beratin, Lushnjen, Gjirokastrën, Shkodrën, Kavajën dhe Lezhën, kurse për bashkitë e tjera taksa ishte 200 lekë/metri kator në vit.
Qeveria ka publikuar çmimet mesatare të referencës për secilën bashki, e ashtu si me banesat, kryesojnë me nivelin e taksës Tirana dhe Durrësi. Në Tiranë, taksa për një dyqan në ish-Bllok dhe zonat brenda Unazës, si për shembull “Myslym Shyri”, është disa herë më e lartë sesa në zonat e tjera të kryeqytetit.
Ndërkohë në rang vendi, taksat më të lira janë në bashkitë e largëta malore, apo qytete thuajse të braktisura, si Memaliaj.
Krahasuar me formulën e taksës së vjetër kemi të bëjmë me rritje të taksës së ndërtesës për dyqanet në të gjithë vendin. Duke marrë si shembull një dyqan që ka një vlerë prej 100 mijë eurosh, me formulën e re taksa shkon në 200 euro në vit. E njëjta mënyrë taksimi vlen për të gjitha dyqanet në të gjithë vendin.
Taksa e shtëpisë
Baza e llogaritjes së taksës së re do të jetë vlera e shtëpisë. Vlera e shtëpisë do të llogaritet me çmimet fiskale referencë për metër katror, që përdorin Zyrat e Regjistrimit të Pasurive të Paluajtshme.
Çdo qytetar mund të bëjë llogaritjet me të dhënat e tabelës, duke llogaritur vlerës e shtëpisë mbi çmimet fiskale dhe taksën 0,05 për qind. Referuar tabelës, çmimi mesatar fiskal për Tiranën është 89,137 lekë/m2. Vlera e një shtëpie me sipërfaqe 100 m2 është 8,913,700 lekë. Taksa për apartamentet e privatizuara, e llogaritur për 70 për qind të vlerës, do të jetë 3119 lekë. Për një familje që jeton në qytetin e Durrësit, në një shtëpi me sipërfaqe 100 m2, vlera e shtëpisë llogaritet 6,750,000 lekë.
Çmimi fiskal për këtë qytet është 67,500 lekë/m2. Taksa do të jetë sa 0,05% e vlerës së shtëpisë, pra, 3375 lekë. Por, në rast se qytetarët kanë në pronësi një shtëpi, të cilën e privatizuan me ligjin nr.7652, datë 23.12.1992, taksa llogaritet për 70 për qind të çmimit të shtëpisë.
Në këtë rast, për familjen që jeton në Durrës, taksa vjetore do të jetë 2362 lekë në vit. Qyteti i Durrësit renditet i dyti pas Tiranës, që do të ketë vlerën më të lartë të taksës, kjo për shkak të çmimit të lartë fiskal që ka ky qytet.
Tabela me çmimet e referencës
