Pas takimit me kryetarët e partive të vogla, Presidenca ka zbardhur edhe diskutimet e bëra. Në njoftimin e bërë nga zyra e shtypit e Presidencës theksohet se Meta ka bërë çdo përpjekje për të nxitur zbatimin e reformës në drejtësi brenda afateve kushtetuese dhe nëse kjo gjë do të kishte ndodhur, nuk do të gjendeshim në këtë krizë politike.
Gjithashtu, Meta ka thënë se mosregjistrimi i të gjitha partive opozitare, rrezikon standardet e zgjedhjeve.
“Kreu i Shtetit shprehu shqetësimin se mosregjistrimi i të gjitha partive opozitare të legjislaturës së fundit parlamentare rrezikon jo vetëm standardet e zgjedhjeve, por edhe pluralizmin politik në vend. Presidenti Meta thekson se nuk është asnjëherë vonë për të reflektuar dhe për të gjetur zgjidhje që do të rivendosnin normalitetin kushtetues, institucional dhe demokratik të vendit”, thuhet në njoftimin e Presidencës.
Theksohet fakti se që më herët Meta ka paralajmëruar domosdoshmërinë e vendosjes së dialogut, për shmangien e përshkallëzimit të konfliktit. Meta konfirmon se do të vijojë të kontribuojë për zgjidhjen e krizës.
“Presidenti Meta nxit dialogun dhe zërat e arsyeshëm, për dekurajimin e përshkallëzimit të mëtejshëm të krizës. Kreu i Shtetit do të vazhdojë kontributin e Tij, me të gjitha format e mundësitë për të kërkuar reflektimin e të gjithëve, me qëllim garantimin, jo vetëm të bashkëjetesës demokratike, por edhe ecurinë e suksesshme dhe të besueshme të reformave të lidhura me integrimin evropian”, thuhet në njoftim.
Sot në takimin me Ilir Metën përveç Fatmir Mediut i cili foli për mediat, kanë qenë edhe Dashamir Shehi, Agron Duka, Nard Ndoka dhe Vangjel Dule.
Partitë e vogla të djathta kërkuan dje një tryezë të përbashkët mes tyre, Ramës dhe Bashës si mënyra e vetme për të zgjidhur krizën. Kërkesat e PR, PAA, LZHK, PDK dhe PBDNJ shkuan deri në ndryshimin e Kodit Zgjedhor dhe të Kushtetutës, për të kufizuar numrin e mandateve për Presidentin, Kryeministrin dhe deputetët si edhe shtimin e dhomës së Senatit në Parlament./Opinion.al
