Kryetarët e partive të vogla kanë zhvilluar sot një takim me Presidentin e Republikës Ilir Meta. Takimi ka zgjatur rreth 60 minuta, ndërsa në përfundim të tij Fatmir Mediu ka folur për gazetarët duke thënë se Meta ndan të njëjtin shqetësim për krizën politike. Mediu u shpreh se Ilir Meta do të angazhohet për veprime edhe me palët e tjera, duke nënkuptuar një tryezë me kryeministrin Rama dhe kryedemokratin Basha.
“Në emër të kolegëve, dua të falënderoj presidentin për një diskutim shumë të hapur në raport me kërkesën tonë. Besoj ndajmë të njëjtin shqetësim që situata është problematike, ndaj duhet të ndalojmë që vendi të shkojë në konflikt. Duhet të lexojmë qartë mesazhet që erdhën nga Berlini. Presidenti i Republikës vlerësoi kërkesën e partive tona, në vlerësim të kërkesave tona do të marrë veprimin edhe me palët e tjera. Ka nevojë për diskutim me të gjitha palët, Presidenti është në të njëjtën valë shqetësimi dhe ka angazhimin që palët të gjejnë përgjegjshmërinë e tyre”, tha ai.
Sot në takimin me Ilir Metën përveç Fatmir Mediut kanë qenë edhe Dashamir Shehi, Agron Duka, Nard Ndoka dhe Vangjel Duke.
Partitë e vogla të djathta kërkuan dje një tryezë të përbashkët mes tyre, Ramës dhe Bashës si mënyra e vetme për të zgjidhur krizën. Kërkesat e PR, PAA, LZHK, PDK dhe PBDNJ shkuan deri në ndryshimin e Kodit Zgjedhor dhe të Kushtetutës, për të kufizuar numrin e mandateve për Presidentin, Kryeministrin dhe deputetët si edhe shtimin e dhomës së Senatit në Parlament./Opinion.al
