Kryeministri Edi Rama ka reaguar një ditë pas takimit të zhvilluar në Bruksel mes kryeministrit Albin Kurti dhe Presidentit serb, Alekasandër Vuçiç.
Nëpërmjet një postimi në rrjetet sociale, kreu i qeverisë shkruan se mirëpret marrëveshjen mes dy palëve për rrugën e normalizimit ndërmjet Kosovës dhe Serbisë.
Rama shkruan se ky është një moment historik për paqen në rajon, ndërsa thekson se Shqipëria mbështet plotësisht çdo përpjekje për të kapërcyer të kaluarën.
Sipas Ramës, Kurti ka bërë gjënë e duhur dhe nuk meriton të quhet tradhtar.
Postimi i Ramës
Paqja dhe bashkëpunimi janë çelësi për të ardhmen që u detyrohemi fëmijëve tanë në këtë rajon të shkatërruar prej shekujsh nga mungesa e paqes dhe bashkëpunimit. E mirëpres pëlqimin e dy palëve për Marrëveshjen për rrugën e normalizimit ndërmjet Kosovës dhe Serbisë.
Ky është një moment historik i rëndësishëm për paqen rajonale dhe unë inkurajoj fuqimisht të gjitha palët e përfshira që të vazhdojnë të punojnë për një zbatim të shpejtë. Për paqen dhe bashkëpunimin, Shqipëria është dhe do të mbetet një besimtare dhe një model roli. Ne mbështesim plotësisht çdo përpjekje për të kapërcyer të kaluarën.
Uroj që askush të mos e akuzojë Albin Kurtin për tradhti apo harresë, por gjithkush të kuptojë se kryeministri i sotëm i Kosovës ka bërë gjënë e duhur, duke hedhur një hap të parë me shumë rëndësi drejt daljes nga kurthi i të djeshmes. Hapa të tjerë pasofshin pa humbur kohë./ Opinion.al
