Kryeministri Edi Rama ka folur për mediat greke pas takimit të zhvilluar në Athinë me emigrantët shqiptarë.
Mediat greke shkruajnë se kreu i qeverisë shqiptare është pyetur nga gazetarët nëse takimi i sotëm kishte lidhje me kryebashkiakun e zgjedhur të Himarës, Fredi Beleri, pasi ditën e sotme bëhej një vit nga arrestimi i tij.
Rama tha se nuk ka një lidhje të tillë, ndërsa shtoi se kjo është histori e politikës greke dhe jo e jona.
“Nuk ka çështje të tillë, nuk është histori për ne. Kjo është histori e politikës greke. Nuk është historia jonë dhe nuk ka të bëjë me ne”,-tha Rama.
Ndër të tjera, kryeministri pas fjalimit të tij në Athinë, është pyetur edhe për marrëdhëniet greko-shqiptare, ku tha: “Shpresoj se do të arrijmë të bëjmë diçka që përputhet me marrëdhëniet fantastike mes njerëzve të zakonshëm të Greqisë dhe Shqipërisë. Ata meritojnë më mirë dhe ne duhet t’u japim politika shumë të ndryshme.”
Kujtojmë që gjatë kohës kur Rama ndodhej në Athinë në takimin me emigrantët, Fredi Beleri me anë të një mesazhi nga burgu e konsideroi atë “si një provokim”.
